ЭРҮҮЛ МЭНДИЙН ЯАМ

МУ-ын ЗГ-ын гишүүн, ЭМ-ийн сайд С.Ламбаагийн урилгаар ДЭМБ-ын Номхон Далайн Баруун Эргийн Бүсийн Захирал Доктор Шин Ён-суу 2010 оны 7-р сарын 8-12-ны өдрүүдэд Монголд албан айлчилал хийх гэж байна. Энэхүү айлчлалын хүрээнд ДЭМБ ба Монгол Улсын Засгийн Газар хоорондын харилцан хамтын ажиллагааг бэхжүүлэх болон хөдөө орон нутагт анхан шатны эрүүл мэндийн үйлчилгээг сайжруулах талаар хэлэлцэх бөгөөд мөн 2010-оны 5-р сарын 17-22-ны өдрүүдэд Женев хотноо болсон ДЭМБ-ын 63-р Чуулга уулзалтын үеэр харилцан гарын үсэг зурсан ДЭМБ-ын Монгол Улсын Засгийн Газартай хамтран ажиллах дунд хугацааны (2010-2015) стратегийг албан ёсоор хүлээн авах ёслолын ажиллагааг зохион байгуулах зэрэг олон ажил хийгдэхээр төлөвлөгдөж байгаа болно. 

Монгол Улсын Их Хурлаас бие даасан “Эмийн тухай” хуулийг анх 1998 онд  баталсан бөгөөд 2002, 2006, 2008 онд тус тус нэмэлт өөрчлөлт орсон ба 2006 оны нэмэлт өөрчлөлтөөр “Эм, эмнэлгийн хэрэгслийн тухай хууль” гэж нэрлэх болсон. Хуулийг хэрэгжүүлж эхэлснээс хойшхи хугацаанд эмийн чанар, хангамж, хүрэлцээ сайжирч байгаа боловч стандарт, чанарын шаардлага хангахгүй эм импортлох, түгээх, зориулалтын бус газар худалдаалах, хууль бус зар сурталчилгаа хийх, эмийг ашиг олох хэрэгслүүр болгох зөрчил байсаар байгаагийн улмаас эмийн бүтээгдэхүүний үйлдвэрлэл, импорт, хангамжийн талаархи төрийн зохицуулалтыг улам боловсронгуй болгох шаардлага урган гарч байна.

“Монгол улсын төрөөс донорын цус, цусан бүтээгдэхүүний хангамжийг сайжруулах, аюулгүй байдлыг хангах талаар баримтлах бодлого /2008-2015/- ын хэрэгжилтийг баруун бүс нутагт эрчимжүүлэх нь“ чуулганыг Эрүүл мэндийн яам,  Дэлхийн эрүүл мэндийн байгууллага, Онцгой байдлын ерөнхий газар, Монголын улаан загалмайн нийгэмлэг, Засгийн газрын хэрэгжүүлэгч агентлаг-Эрүүл мэндийн газар, Цус сэлбэлт судлалын үндэсний төвтэй хамтран  2010 оны 7 дугаар сарын 01-02-ны өдрүүдэд Ховд аймагт амжилттай зохион байгуулав.